Baledweyne(INO)- Shirweynahan loogu magac daray Samadoon II ayaa waxaa furintaankiisa goobjoog ka ahaa Ugaas Cabdiraxman Ugaas Khaliif, guddoomiyaha maamulka gobolka Hiiraan Yuusuf Axmed Hagar, mas’uuliyiin ka soctay dowladda dhexe, Saraakiisha Ciidamada Dowladda Somalia, AMISOM iyo qaybaha bulshada kasoo jeedda beesha Xawaadle.
Ugaas C/raxmaan Ugaas oo lahaa qaban-qaabada shirka oo furintaanka hadal jeediyay ayaa sheegay in shirkaani yahay mid xambaarsan labo ajande oo kala ah dib-u-dhiska garoonka diyaaradaha Beledweyne, iyo qodobka labaad oo nooqnaya in beeshu wada-tashi furan ka yeellato Aayaheeda danbe oo la oran karo waa qodob xasaasi ah oo dood adag laga yeellan doono.
Taliyaha ciidamada Jabuuti ee gobolka Hiiraan Col Cismaan Dubad oo ka mid ahaa marti-sharftii lagu marti-qaaday shirka, ayaa xusay in marka hore uu uga mahad-celinayo Ugaas C/raxmaan marti-qaadka uu u fidiyay inuu kasoo qeyb-galo furitaanka shirka, isagoo intaa ku daray in mar walba loo baahan yahay bulshada ama qabaa’ilada Soomaaliyeed yeeshaan kulamada noocan oo kale ah oo leysku xog wareysanayo si looga wadda hadlo arimo badan oo quseeya hormarka bulshada.
Col. Cismaan Dubad ayaa si gaar ah ugu dheeraad marxaladda garoonka Ugaas Khaliif ee magaalada Beledweyne oo sida uu sheegay u baahan in loo kaco dib-u-dhiskiisa, isagoo ku daray hadalkiisa in Dhnacooda (AMISOM) gacan weyn ka Geysanayaan Qorshaha Ugaas C/raxmaan ee ah wax ka badal lagu sameeyo muuqaalka uu xiligan leeyahay Garoonka oo ah ayuu yiri mid aan wanaagsaneyn.
Xildhibaan Samiira Xassan C/dulle oo ka mid ah mudanayaasha baarlamaanka DF Somalia oo ka hadashay shirka ayaa sheegtay dowladda dhexe bogaadineyso kulammada noocan oo kale ah oo ay bulshada uga Wada-hadlayaan Hormarka, Dhinaca kalena uga Tashanayaan Aayahooda iyo masiirkooda danbe, iyada oo intaa ku darrtay in xogta ku saabsan shirka la waddaagi doonto dowladda dhexe.
Daahir Wasme Fiidoow oo ah agaasimaha waaxda dib-u-hishiisiinta wasaarrada arrimaha gudaha iyo federaalka xukuumada Somalia, ayaa ka codsaday ka qeyb-galayaasha shirka, in ay u hogaasamaan soo jeedinta Ugaaska ee ah in gacan laga geysto dib-u-dhis lagu sameeyo garoonka diyaaradaha magaalada Beledweyne oo muhiim u ah ayuu yiri isku xirka gobolka iyo dalka intiisa kale.
Guddoomiyaha gobolka Hiiraan oo ugu danbeyntii kulanka ka hadlay ayaa sheegay in ka maamul ahaan mas’uuliyad ka saaran tahay sida uu hadalka u dhigay ilaalinta ammaanka shirka mudada uu socdo, isaga oo ku tilmaamay shirka uu yahay mid dhaqan.
Ugu danbeyntii, Shirweynahaan maanta furmay oo si weyn isha loogu wada-hayo ayaa la filayaa in maalmaha soo socda lagu faaqido arrimo dhowr ah oo taabanaya guud ahaanba qeybaha kala duwan ee nolasha maadaama ajandaha labaad ee shirka lagu sheegay Aayo ka tashi.
C/raxmaan Diini, Idale News Online, Beledweyne
