Muqdisho(INO)- Wasiirka Gaashaandhigga ee Dowladda Federaalka ee Soomaaliya Gen. C/qaadir Sheekh Cali Diini oo wehliyo Taliyaha Ciidanka Badda ee Soomaaliya Admiral. Madey Nuurey Sheekh Ufurow, ayaa galabta ku booqday xeebta Liido dhalinyaro Soomaaliyeed oo ay rasaas ku fureen Ciidanka Midowga Africa ee AMISOM, kadib markii ay ku soo dhawaadeen xeebta garoonka.
Wasiirka ayaa kormeer ku sameeyey saddex doomood oo ay leeyihiin Kaluumeysatada kuwaas oo ka muuqdeen rasaas, wuxuuna sheegay Wasiirku in guddi baaritaan ku sameeya loo saaray arintan. Isagoo dhinaca kale uga digay Kaluumeysatada Soomaaliyeed in ay xiliyada habeenkii ah ku dhawaadaan garoonka iyo Dekadda Muqdisho kuwaasi oo dhibaato ka soo gaari karto.
Wuxuuna yiri.“Waxaan u saarnay dhacdadan guddi baaritaan ku sameeya qaabka ay wax u dhaceen iyo khasaaraha soo gaaray kalumeysatada, Waxaan uga digeynaa Kaluumeysatada ka shaqaysa Muqdisho in ay u dhawaadaan goobaha ay Ciidamaddu dagan yihiin sida Garoonka Diyaaradaha iyo Dekadda Muqdisho.
Idale News Online, Muqdisho
