Samarkand(INO)- Madaxweynihii Wadanka Uzbekistan, Islam Karimov, ayaa waxaa maanta aas ballaaran loogu sameeyay Magaalada Samarkand, oo ah goobtii uu ku soo barbaaray.
Maalmihii la soo dhaafay, ayaa waxaa la hadalhaayay geerida Madaxweynaha, balse Jimcihii ayay si rasmi ah Xukuumadda Tashkent ugu dhawaaqday geerida ku timid.
Meydka Islam Karimov, ayaa diyaarad looga qaaday Magaalada Caasimadda ah ee Tashkent, iyadoona lagu gaarsiiyay Magaaladii uu ku soo barbaaray.
Ra’iisal Wasaaraha Ruushka, Dmitry Medvedev, Madaxweynaha Afghanistan, Ashraf Ghani, Madaxweynaha Tajikistan, Imomali Rakhmon iyo xubno kale, ayaa ka qaybgalay aaska.
Islam Karimov oo 78 jir ahaa, ayaa dalkaasi soo xukumaayay 25 sano, iyadoo uu in muddo ah xanuunsanaayay, ka hor intii aan Jimcihii la shaacin geeridiisa.
Dowladda, ayaa waxay ku dhawaaqday saddex maalmood oo baroordiiq qaran ah oo loo samaynayo Madaxweynaha geeriyooday.
