Muqdisho(INO)-Guddoomiyihii hore ee Gobolka Banaadir Maxamuud Axmed Nuur (Tarsan) ayaa sheegay Madaxweynaha Somaliya Xasan Sheekh Maxamuud iyo Xukuumadda laga rabo inay ka faa’iideystaan go’aanka Baarlamaanka uu qaatay ee ku saabsan ciidamada Kenya ee Somaliya jooga.
Qoraal uu soo dhigay Tarsan boggiisa Facebook ayuu ku sheegay Madaxweynaha Somaliya in laga doonaayo in kalsooni uu ku abuuro Madaxweynaha Jubbaland si ay aragti mideysan uga qaataan arimaha Kenya.
“Waxaan ka codsani Madaxweynaha iyo xukuumada in ay ka faaideystaan fursada uu u sameeyey Barlamaanku. Madaama uu barlamaanku yahay hey’adii sharci dejinta xukuumada waxaa laga rabaa in ay fuliso go’aanada ay sharciyeeyeen, Kenyana u sheegaan in Barlamaankii sharciyeeyey in ciidamada Kenya dalka ka baxaan oo ay ku ekaadan xuduudkooda dowladuna balanqaado in ay dhankeeda sugeyso xuduudkena. Taasi sidey bey ku imaan kartaa.”?
Tarsan ayaa hadalkiisa intaasi wuxuu ku daray in Axmed Madoobe uu yahay muwaadin Somaliyed oo wadani ah, laakiin duruufo jira awgeed sabab ay u noqonayso in Kenya uu u dhawaado.
“Waxaan qabaa in Madaxweynuhu uu wada hadal dhab ah la galo Madaxweynaha Jubaland, waxaan aaminsanahay in Axmad Madoobe uu yahay wadani run ah laakiin ay heysato daruufo badan taas oo ku riixeysa in uu u ku dhowaado dowladda Kenya Waayo waxaa jirta kalsooni daro ka dhexjirta madaxda dalka oo dhan taasna waxay keentey in ay ku heshiin waayaan danaha dalka. Sidaas darteed Madaxweyne Hassan Sheikh waxaa laga rabaa in uu kalsooni abuuro gaar ahaan kalsoonida Axmad Madoobe. Waxaan ku talini in uu qaado tilaabooyinka soo socda.”
Ugu dambeyn Guddoomiyihii hore ee Gobolka Banaadir Tarsan ayaa u soo jeediyay Dowladda Somaliya inay qaadato lix qodob oo uu u arkay Tarsan inay xal u tahay arinta xuduuda.
1-In uu wadahadal dhab ah la galo Axmad Madoobe si ay isku aragti uga noqdaan maslaxada dalka iyo rabitaanka Kenya ay ku dooneyso badda Somaaliyeed iyo burburinta soohdintii u dhaxeysey Kenya iyo Somaaliya oo uu isticmaarkii ka tegey.
2- In Axmad Madoobe la siiyo kalsooni in uu yahay masuul Somaaliyeed, garab xoogana ay dowladu u noqoto sidii uu u hanan lahaa amniga Gobolkaas iyo la dagaalanka Al Shabaab.
3- In Dowladu Axmad madoobe garab ku siiso sidii uu wada hadal dhab ah ula geli lahaa qabaa’ilka wax tabanahaya si loo mideeyo awooda bulshada ku nool goboladaas, Waxaa muuqata in uusan jirin in hogaamiye kula tartami kara hogaanka Jubaland dowladuna waa in ay taas fahamtaa.
4- in dowladu diyaariso ciidan bedeli kara ciidamada Kenya hanan karana amniga xuduudkaas, waana in uu noqdaa ciidan isku dhafan hogaankiisuna uu talo ku yeeshaa Madaxweynaha Jubaland, waana in uu ciidankaas noqdaa mid uu amar ku leeyahay Axmad Madoobe.
5- Dowladu hadii ay dhabka tahay in ay hanato dalka amnigiisa waa in ay dejisataa qorshe waqtiyeeysan oo ay kula wareegeyso amniga iyo maamulka xuduudyada waayo dowlad aan awood u lahayn in ay xuduudkeeda ka adkaato, oo uu xuduudkeedu furanyahay amni ma sugi karto.
6- Madaxda dalka oo dhan oo ay ka midyihiin madaxda dowlad goboleedyada waxaan kula talin lahaa inta aad garab iyo taageero ka radineysaan dal kale oo danihiisa wata, in aad dhexdiina ka raadisaan kalsooni.
Idale News Online, Muqdisho
