Madaxweyne Xassan Sheekh oo soo dhaweeyay taageerada dalka UAE u fidiyo Soomaaliya

0
159

Muqdisho(INO)-Madaxweynaha Soomaaliya, Xassan Sheekh Maxamuud ayaa shalay la kulmay safiirka Imaaraadka Carabta u fadhiya Soomaaliya, Maxamed Axmed Al-cusmaan.

Madaxweyne Xassan Sheekh ayaa kula kulmay safiirka Imaaraadka Carabta u fadhiya Soomaaliya, Maxamed Axmed Al-cusmaan caasimada Muqdisho. Madaxweynaha ayaa ammaanay taageerada dalka Imaaraadka Carabtu u fidiyo dalka Soomaaliya arintaana uga mahadnaqay dawlada dalkaa.

Madaxweynaha iyo safiirka Imaaraadka Carabta u fadhiya Soomaaliya, Maxamed Axmed Al-cusmaan ayaa ka wada hadlay sidoo kale xiriirka guud ee u dhexeeya labada dal iyo weliba siyaasada gobolka iyo caalamka wixii ugu dambeeyay ee kusoo kordhay.

Safiirka Imaaraadka Carabta u fadhiya Soomaaliya, Maxamed Axmed Al-cusmaan ayaa uga mahad celiyay madaxweynaha Soomaaliya sida uu isugu dayayo wanaajinta iyo sii horumarinta xiriirka u dhexeeya dalkiisa iyo Imaaraadka Carabta.

Dalka Soomaaliya ayaa xiriir wanaagsan oo ganacsi la leh Imaaraadka Carabta ayadoo Soomaalidu ay kujiraan dadka ugu badan ee ka ganacsada dalka Imaaraadka Carabta.

Badeecooyin badan oo ka yimid Imaaraadka Carabta ayaa sanad waliba la keenaa Soomaaliya. Soomaaliya ayaa ah mid ka mid ah suuqyada ugu muhiimsan ee dalka Imaaraadku usoo dhoofiyo alaabada ama badeecooyinka kala duwan.