Baydhabo (INO)–Dowladda Koonfur Galbeed Soomaaliya ayaa ka dalbatay DF Soomaaliya inay jawaab qeexan ka bixiso Weerar Ciidamada nabad sugida ay ku qaadeen Wasiirka Ganacsiga iyo Warshadaha ee Dowladda KGS Mudane Cabdullahi Sheekh Xasan oo ku sugan Deegaanka Jazeera, ee Gobolka Shabellaha Hoose.
Wasiirka ammniga Dowladda KGS , Cabdifitaax Maxamed Ibraahim Geeseey ayaa sheegay in uu ka xun yahay in Ciidamada Qaranka loo isticmaalo dano gaar ah islamarkaana lagu weeraro Deegaanka Jasiira sida uu hadalka u dhigay.
“Waa nasiib daro in arrintaani ay dhacdo, iyadoo labada Madaxweyne ee Xassan Sheekh iyo Shariif Xassan ay si wadajir ah ugu wargaliyeen Gudoomiyaha Gobolka Banaadir Muungaab in xuduudaha Gobolka Koonfur Galbeed Soomaaliya ay la wareegeen Ciidamada Dowladda KGS ” Waxaa Sidaas yiri Cabdifitaax Geeseey.
” Gudoomiye Muungaab, ayaa la Ogeysiyey 20kii Bishii Janaayo ee Sanadkan,in degaanka Gobolka Shabellaha Hoose ay ka howlgali doonaan Wasaaradaha Dowladda KGS iyo Ciidankeeda, Ciidamada Halkaasi Jooga, wasaaradda Amniga Dowladda KGS ayaa halkaasi u dirtey,Shaqaalaha wasaaraddaaha Ganacsiga iyo Maaliyadda ayaa Shaqo halkaasi ka haaya” ayuu yiri Wasiirka Amniga Dowladda KGS.
Ugu Dambeyntii Afhayeenka Maamulka Gobolka Banaadir, Cabdifitaax Xalane ayaa dhankiisa ku eedeeyay Wasiirka Ganacsiga Dowladda Koonfur galbeed Cabdullahi Sheekh Xassan in calanka Dowladda KGS uu ku suray Deegaan uu sheegay in uu ka tirsan yahay Degmada Wadajir ee Magaalada Muqdisho.
Idale News Online, Xafiiska Baydhabo.
