Tiyeeglow(INO)- Wararkii ugu dambeeyay ee naga soo gaaraya degmada Tiyeeglow ee gobolka Bakool ayaa waxa ay sheegayaan in ururka Al-Shabaab ay gacanta ku hayaan degmadaasi.
Dadka Deegaanka ayaa cabsi badan ay soo wajahday, waxaana dadka qaar ay ka barakaceen guryahooda.
Dad farabadan ayaa lagu waramaya in ay xalay iskaga baxeen degmada Tiyeeglow ka dib markii shalay ciidanka dowladda Itoobiya ay shaaciyeen in ay iskaga baxayaan degmadaasi.
Qaar ka mid ah dadka deegaanka ayaa warbaahinta u sheegay in ay gudaha Magaalada ay gaafwareegayaan dagaalyahano ka tirsan Al-Shabaab ayna xaafadaha Qaarkood ay ka baraayaan dadkii la shaqeyn jiray maamulka Degmada Tiyeeglow.
Al-shabaab ayaa Degmada Tiyeeglow waxa ay ku dileen 2 Askari oo ka tirsan Ciidanka Dowladda, kuwaas oo ku sugnaa Degmadaasi.
Ciidamada Itoobiya oo ka mid ah howlgalka AMISOM ayaa waxa ay u baxeen dhanka degmada Xudur ee gobolka Bakool, sida dad goob joogayaal ah u sheegeen warbaahinta.
Ciidamada dowladda iyo kuwa Itoobiya waxa ay qabsadeen Tiyeeglow 25kii bishii August ee sanadkii ee 2014.
Tiyeeglow waa magaalo istiraatiiji ah, waxa ay isku xirtaa gobolada Hiiraan iyo Bakool, waxayna qiyaastii 90 km u jirtaa magaalada xarunta u ah gobolka Bakool ee Xudur, sidoo kale waxa ay 140 km u jirtaa magaala madaxda gobolka Hiiraan ee Beledweyne.
Ciidamada Itoobiya waxa ay bilihii ugu danbeeyay ka baxeen deegaanada Ceel Cali, Moqokori, iyo Halgan ee gobolka Hiiraan. Dhinaca gobolka Bakool waxa ay isaga baxeen deegaanada Rabdhuure, Buurdhuxunle, iyo Garasweyne. Dhinaca gobolka Galgaduud waxa ay ka guureen deegaanada Budbud, iyo Galcad.
Ma jiro waxa wara oo ka soo baxay ciidamada Itoobiya oo ku aadan ka bixitaankooda deegaana dhawra oo ku yaala koonfurta iyo bartamaha Soomaaliya.
Bixitaankan u dambeeyay ee Tiyeglow ayaa imaanaya iyadoo dowladda Itoobiya ay wajaheyso mucaaradad xooggan iyo mudaaharadyo rabshado wata oo ka socda gudaha Itoobiya.
