News York(INO)— Hub uu Mareykanka siiyay Mucaaradka Suuriya ee dhex dhexaadka ah ayaa waxaa uu u gacan galay Jabhadda Al-Nusra Front ee xiriirka la leh Ururka Al-Qaacida.
Dagaalyahanada Suuriya ee uu tababaray Mareykanka ayaa la sheegay in hubkii dagaalka ee la siiyay ay ku wareejiyeen Jabada Al-Nusra.
Waaxda Difaaca Mareykanka ayaa sheegtay in sababta ay dagaalyahanada Mucaaradka hubka ugu wareejiyeen Kooxda Al-Nusra ay aheyd, si ay u helaan marin xasilooni ay ku gudbaan.
Afhayeen u hadlay Pentagon-ka ayaa walaac ka muujiyay hubka lagu wareejiyay Al-Qaacida, waxaana Mareykanka sheegay inuu baaritaan ku haayo arrinta hubkaas.
Mucaaradka Suuriya ayaa ku wareejiyay Al-Nusra lix gawaarida dusha ka furan, rasaas iyo agabyo kale oo u dhigma afar meelood meel qalabkii uu Mareykanka siiyay.
Kooxaha Fallaagada ayaa qeyb ka mid ah Suuriya kula dagaalama Dowladda Bashar Al-Asad, iyadoo aanay xilligan mideysneyn kooxaha mucaaradka, hadana waxaa jira dagaalyahano Islaamiyiin ah oo iyana dagaal kula jira Xukuumadda Suuriya.
Kooxda isku magacawday Khilaafada Islaamka ee Daacish iyo Jabhada Al-Nusra ayaa qeybo ka mid ah Suuriya gacanta ku haya, waxaana sidoo kale Kooxaha Islaamiyiinta ay qudhooda yihiin kuwo aan mideysneyn.
Idale News Online, News York
