12 ruux ayaa dhimatay, in ka badan way ku dhaawacantay, markii maanta laba beelood ay ku wada dagaalameen inta u dhaxeyso Degmooyinka Guriceel iyo Balanbal ee Gobolka Galgaduud.
Dagaalkaan, ayaa wuxuu ka dambeeyay markii nin ganacsade ahaa oo ka soo jeeda mid ka mid ah labada beelood shalay lagu dilay duleedka Degmada Balanbal.
Dagaalka, ayaa wuxuu saakay ka qarxay deegaanka Baaga, iyadoo uu si xoogan ugu fiday deegaanada Shilinta iyo Garas-gaabta, waxaana la xaqiijiyay inay ku dhinteen 12 ruux, tiro kalana ay ku dhaawacantay. Waxaana dhaawacyada loo kala daabulay isbitaalada Guriceel iyo Caabudwaaq.
Hareeri Xasan Barre, Gudoomiyaha Degmada Balanbal, ayaa wuxuu sheegay in duhurnimadii maanta la kala dhex galay beelaha wada dagaalamay, isla-markaana ay iminku degan tahay xaalada.
Gudoomiyaha Maamulka Gobolka Galgaduud Xuseen Cali Wehliye (Cirfo), ayaa wuxuu wax laga xumaado uu ku tilmaamay in ay wada dagaalamaan beelaha walaalaha ah ee wada degga Gobolka Galgaduud.
Gudoomiyuhu wuxuu ku baaqay in laga wada hadlo oo xal laga gaaro wixii leesku haayo, bacdamaa uu sheegay in shacabka Somaliyeed ay ka dheregsan yihiin, waxa ay tahay natiijada haddii la wada dagaalamo.
Idale News online Balanbale.
